Yera ochobre. Detrás del ventán podía vese'l cielu preñáu de nubes plombices que dacuandu en vez facíen cayer unes gotines. El vientu yera'l que nun dexaba que lloviera más, un vientu forte, fríu, enriador. Prestábame velu xugarretiar cola poca xente que taba na calle de pasu, faciéndo-yos difícil la caminada y golpiando ropes y guedeyes, tornándolos pequeñinos torbellinos ebrios, a puntu romper l'equilibriu. Los paxarinos yeren más llistos, suspendíen el vuelu aguardando no culto. Cuasi como yo, tres la ventana, aldovinando na oscuridá onde taba'l vientu. Siguía ellí. Sentíalu, sentíalu metese per tolos llugares; colábase pente los árboles, pente les casines, resbariaba alloriau so l'asfaltu en pos daqué, mesmamente quería entrar en casa pero nun podía. Notábalu xunto'l cristal forciando, puxando parecíu por pasar.
" ¿Y si lu dexara? ¿Acasu llámame? Sí, creyo tar sintiendo comu diz. . .mio nome. ¿Ye'l mio nome? ¡Sí!"
Puse la man nel vidriu y noté'l rixu mayor qu'enantes, como si quixera entrar y llevame.
SSSSSusssannnna, SSSSSussssannnaaaa.
Si ficiéra-y casu, diría con él, sabría de tolos requexos, xugaría a nun dexar esnalar a los páxaros, a quita-yos les pañoletes a les vieyes, espelurciar muyeres, desentrastiar les calles. . .Xugaría y esnalaría, sería más que los páxaros, yo podría dir au quixiera.
SSSSSussssanna, SSSSSSSusssannnaaaa, SSSSuuussssaaa. . .
" Llámame, llámame".
Fícelo. Abri'l ventán. Nun hai manera posible d'esplayar el miu gociu. Esnalé pente los árboles, pente les cases, sol asfaltu. . .Y xugué. Maravielloso. Sentíame diosa. Vi la mio casina dende lo alto, vi'l mar, otres tierres, y lo meyor ¡toqué les estrelles!. Túveles na mano y diéronme paz. "Voy quedame con elles, y col vientu. Son mios collacios. Pero pa quedame, tengo volver, xunto los mios. Llueu esnalaré otra vegada. M'aguarden".
Ganosa e illusionada torné tras la ventanina. Agora sabía qué facer. Dir a la cama. Enantes entamar a dormir dexéla abierta. . .
Na mañana, vi dende arribón a la mio hermana Yola, pero nun yera a calletrar porqué lloraba. Ablayé un rispiu pero los mios collacios consoláronme la tristura. Yola siguía llorando so la mio cama. Vila garrame la cara, vila nomame, pero yo nun dicía un res. Nun taba. Tanta xente y tantes llárimes perdíes, toos col mio nome nos llabios. Pero'l mio nome arrancólu'l vientu. Equí, no alto, soi feliz. Nun tenéis por què llorar.
Trescurrió abondu tiempu y yo sigo esnalando y xugarretiando. Entrín y non, veo a yola xunto la ventana. Paez murnia. La señardá pésame y por eso vístola de cutiu. A vegaes llámola, mui sele, y creyo sintióme dalguna. ¿Querrá venir conmigo? Güei sabrélo. Güei llamaréla más forte y ¿quien sabe? Si abre'l ventán, quiciabes venga a volar conmigo.
No hay comentarios:
Publicar un comentario